Nandito ang impormasyon Tungkol sa Mga Kwento.

(In alphabetical order…)

• ‘And now, gentlemen, you must have a national hero.’ - Batman
• “My Hero…” – Power Ranger
• Aklat-Gabay sa Pagkamit ng Agimat Magical Circle of the Golden Rizalistas - Batman
• Alas-dos ‘y medya na. - Baby Darna
• American Idol – Marie Claire
• Ang Alamat ng Posporong Rizal – Berdeng Rosaryo
• Bagong Kapalaran – Donya Pie
• Bahay – Old Cell
• Barber Joe – Marie Claire
• Barong-barong – Power Ranger
• Bidyo Geym – Superman
• Imported – Superman
• Katotohanan – Baby Darna
• Little Prince sa Pinas – Marie Claire
• Noli Me Tangere Por Pabor – Berdeng Rosaryo
• Paalam – Father Salvation
• Panakot ni Nanay – Berdeng Rosaryo
• Patayin ang Torpe – Power Ranger
• Pinta – So Hee Kwon
• Piso – Superman
• Prop JR! – Marie Claire
• Rizal vs Piolo – Marie Claire
• Sa Mga Bata – So Hee Kwon
• Salamin, salamin – Baby Darna

Ang bawat kwento ay orihinal at binubo lamang ng 100 salita.

“Naku, ma-le-lengok na naman ako kay bosing,” wika ni Ilyud ng napansin niya na kumakapal na ang trapik sa Pasig. Pagtingin niya sa malayo, nakita niya ang luntiang rebulto ni Rizal at napatingin ulit sa harap upang bumusina. Maya-maya’y may lumapit sa kanyang matandang babae sa may bintana, at bago pa man makasalita ang matanda, kinatukan na ito ni Ilyud.

“Wala, wala.” ang bukas ng bibig niya sa loob ng kotse.

Pagtingin ni Ilyud sa may rearview mirror, napansin niyang di naman gaanong gusgusin ang babae na naglilimos na sa susunod na kotse. Sana, nagpabili na lang siya ng kape.

Big Bill,

Ipinarating mo na mainit, mahirap katrabaho ang mga unggoy, at magulo ang sitwasyon diyan sa Pilipinas. Para dumali ang trabaho mo, padadalhan kita ng mga psychic mind control modulator de-modulator transmitter. Isang aparatong nagsasabog ng signal upang maging masunurin sa Estados Unidos ang mga unggoy.

Maliit lamang ang lawak ng signal, kaya maghanap ka ng paraan upang maikalat ang transmitter sa buong bansa. Siguro naman may bayani silang tinitingala at tinatayuan ng monumento sa mga paaralan at mga plasa. Lagyan mo ng transmitter sa loob ang mga rebulto.

Dapat hindi kapansinpansin para hindi sila magduda.

1. Kumuha ng mapa ng mga rebulto ng Panginoong Rizal. (Bawat miyembro’y binibigyan kapag naging minor archon.)
2. Gumuhit ng linyang ipagdudugtong-dugtong ang Rebulto Major, magsimula sa estatwa sa Luneta (ang sentro ng kapangyarihan).
3. Gumuhit ng bilog upang ipagdugtong-dugtong ang Rebulto Minor. Magsimula sa estatwa sa Calamba, matapos sa estatwa sa Paco (ang bilog ay walang simula o katapusan, tulad ng Panginoon).
4. Markahan ang gitna ng mabubuong pentagram.
5. Sa tamang oras at araw ng kamatayan ng Panginoon, pumunta sa minarkahang gitna, at kumain ng tatlong pirasong piso.
6. Hindi ka na tatamaan ng sakit, pinsala o kamatayan.

Suot niya ang overcoat na binili sa ukay-ukay. Tinanggal niya na rin ang ponytail ng kanyang balbas at nag-ahit. Hiniram ang gel ni kuya na kakaalis lang papuntang Madrid.

Tiningnan ni Mike ang kanyang sarili sa salamin. Parang hindi siya. Inayos niya muli ang kurbata dahil medyo nasasakal ang kanyang kayumangging leeg. Habang inaayos ang kanyang kwelyo biglang may narinig na malamig na boses sa salamin…

“Mike…. Mike…”

Nagsitayuan ang balahibo ni Mike at napatingin sa likod. Siya ay nag-iisa na lang sa bahay. Si kuya, nasa Espanya. Si nanay at tatay, nasa kabaong nila. Kahit yung Santo Niño, nawawala.

Matapos huminga ng malalim, ikinawit ni Chinggay ang buhok niya sa likod ng kanyang tenga. Dinampot niya ang piso na nasa mesa at tinanong:

“Sasabihin ko na ba kaya kay Emman?”

Matapos magtanong, itinapon ni Chinggay ang piso sa hangin. Tumambling-tambling ito at sinalo niya gamit ang kanyang braso, sabay takip gamit ang kanyang kaliwang kamay. Pinikit niya ang kanyang mata at huminga ulit ng malalim. Sa kanyang pagdilat ay tinanggal ang pagkakatakip ng kanyang kamay sa pisong tinapon.

Hindi siya hinarap ng ulong nakaguhit sa pera, ngunit nagkaintindihan sila at kinuha ni Chinggay ang cellphone mula sa kanyang bulsa.

Idolo ni Bryan ang tatay niya. Masipag, respetado, at hinahangaan ng maraming tao ang ama ni Bryan.  Kamamatay lang nito sa sakit noong isang buwan.

Nakita ni Bryan ang katangian ng kanyang yumaong ama sa bago nilang Filipino propesor na si Carlo. Madali itong lapitan kung kaya nama’y hindi nahihiya si Carlo na magpaturo dito.

Napansin ni Bryan na laging hinahawakan siya ng propesor sa likod at hita. Napagtanto niyang bakla ang kanyang propesor. Ngunit hindi nagalit si Bryan. Bagkus ay hinayaan lamang niya ito hanggang sa magyayang makipagtalik ang propesor. Kaawa-awa niyang tiningnan ang busto ni Rizal sa silid.

Nakakainis talaga si mama. Lagi na lang akong pinupuntahan sa parke para pauwiin sa bahay. Papagalitan pa niya ako at sasabihing, “Sige, pag naabutan ka ng alas sais ng hapon, gagawin kang bato ng rebultong nakatayo diyan sa gitna!”

Tinanong ko si papa kung sino yung binabantayan ng mga pulis sa gitna ng parke. Sabi niya, Jose Rizal ang pangalan ‘nun. Sikat daw ‘yun nung bata pa sila papa. Lagi daw napag-uusapan sa klase.

Siguro, magaling siya sa klase kaya lagi siyang napag-uusapan. Naku! Baka totoo nga ang sinasabi ni mama. Uuwi na ako nang maaga araw-araw. Ayokong maging bato.

Noong unang panahon, may isang batang nagngangalang Jose. Masipag mag-aral si Jose. Katuwang niya sa pag-aaral ang kanyang nanay Dora at isang lamparang pinaliliwang ang buong silid. Manghang-mangha si Jose sa ilaw ng lampara. Madalas ay nakakalimutan na niyang mag-aral dahil sa pagtitig dito. Nagpatuloy ito hanggang sa bumaba ang marka ni Jose sa eskwela. Nalaman ito ni nanay Dora at galit na sinabi kay Jose, “Sana maging apoy ka na lang magpakailanman!” Kinabukasan, wala na si Jose sa kanyang silid. Sa kama niya’y may nakahigang isang kahon ng posporo. At ang malungkot na mukha ni Jose ay nakaimprinta dito.

Matagal ng gusto ni Anton ang isang kaklase, nguit alangan syang manligaw. Bukod sa natural na kagandahan at katalinuhan ng kanyang iniirog, mayaman rin siya samantalang si Anton ay mahirap lang. Isang araw, napag-usapan sa klase ang tungkol sa matataas at mabababang rebulto ni Jose Rizal. Nang matapos ang diskusyon, isang pasya ang nabuo sa isipan ni Anton. Hindi na niya palalampasin ang pagkakataon at sasabihin na niya ang kanyang nararamdaman sa babaeng mahal. Dahil tulad ng rebulto ni Rizal, hindi naman mahalaga kung gaano man ito kataas o kababa. Ang mahalaga lang ay ang pagmamahal, mapa-bayani man o mapa-tao.